Martinisummer

Mundartecke Sevelen

Merken
Drucken
Teilen

Silberfäde an de Stuude,

Spinnegweeb im letschte Glanz

vu dr milde Spootherbschtsunne,

überem Riet en Muggetanz.

S goht en Moler jetz dur d Wälder,

schenggt us sinner Meischterhann

jedem uuschiibare Blättli

e herbschtligs, farbeprächtigs Gwann.

Still isch uf de n Alpe worde,

s grööpelet em Wanderer schier

so elei, nu mit em Chrache

vumene Steischlag im Revier.

Über d Felse, über d Zagge

huscht no en verloorne Schii.

Liit nid i sim letschte Lüüchte

no e chli vum Summer drii?

Souwetter

Dr Tüüfel söll doch s Wetter hole,

sit Tage regnets, s ischt e Schann!

En blaue Flegg – scho züchen wider

di schwäre Nebel umenann.

S letscht Höö isch djuss! Was söll me mache?

Vortiiliwetter seit me dem,

wenn d Froue rummen oder büezen,

unn d Puure uuguet Luune henn.

Unn d Wetterfrösche z Züri junn,

die schwabblen all im Wetterpricht

vum Hoech, wo jetz vum Weschte her

ganz gschtäätli chömm – doch nu vilicht!

Doch wemmer selber s Wetter miechen?

I säg es gad: das wär doch nett,

wenn jedes uf sim Huus unn Garte

sis eige Hoechdruggzentrum hett!

I globe zwor, dr Wettermacher,

dr Petrus, machts trotzdem nid schlecht.

Er cha bigoscht nid allne deäne,

unn wenn ers chönnt – wärs o nid recht!

Ernst Hofmänner, Sevelen, Bauer und Journalist, 1916–2005, gab in verschiedenen Schriften seine poetischen Werke heraus. Die beiden Gedichte stammen aus «Bis zfriide» und «Nimm dr echli Zit». Die Mundartecke wird von der Historisch-Heimatkundlichen Vereinigung der Region Werdenberg betreut.