D Iichoofsmeile vu Grabs

Sit e paar Wuche schtoot der Ochse z Grabs numme, me het das groes, statlig Pöi un der Blogg derhinner abgrupft. O s Huus vu der früenere Drogerie Alpflor ischt ewegg und jetzt hets zmool zmitzt im Dorf hinn en lääre Platz ggii.

This Isler
Drucken
Teilen

Sit e paar Wuche schtoot der Ochse z Grabs numme, me het das groes, statlig Pöi un der Blogg derhinner abgrupft. O s Huus vu der früenere Drogerie Alpflor ischt ewegg und jetzt hets zmool zmitzt im Dorf hinn en lääre Platz ggii. Näiswie passt daas, wil üsseri Dorfschtroos scho long numme daas ischt, was me si unner nere attraktive Iichoofsmeile chönt voorstelle - si lebt numme as wi no vor füfzg Joor.

Im sebe Huus nebet dem Blogg henn i der Drogerie der Herr unn d Frou Segenreich alls verchooft, wo d Grabser pruucht henn, emol wenn si no nid esoe chrangg gsii sinn, as si gad hetten müse zum Toggter Widmer, wo gad e paar Meter witer siini Praxis gchoo het. Nebet de Arzneie ischt der Laade o eso näises wi e Parfümerii gsii, do hescht chönne füre Vatter seb Pitraloon gu choofe un für d Mamme e Sibenevierzg-Älf- Kölnisch Wasser.

Der Herr Segenreich ischt viilsitig begaabt gsii, unner onnerem het er chönne fotigrafiere un o filme. Wenn me jetz selber i simm Fotiapparat der Film voll koo het, denn ischt me mit em sebe ähi i d Drogerie. Ggwuuli isch es zehe Tääg ggonge, bis denn d Fotene chuu sinn. Zehe Tääg, seb sägni, ischt e longi Zit. Drum ischt me schon vum füfte n ewegg jeede Tag ge frööge, ob d Fotene scho chuu seien.

Normalerwiis isch denn d Frou Segenreich im Laade gschtonne un het gfrööget: «Matis, was wötsche du aa?» Jä joo, d Frau Segenreich het, emol wi miir Goofe pmäit henn, nid ganz recht chönne reede, sie ischt usem Wälsche gsii. Wenns denn ebe um Fotene ggonge n ischt, het si dure Gang ihi ggrüeft: «Anns, gume do aane!» Seb ischt scho äll en Gschpass gsii, as si seb «H» nid het chönne sääge. Aber o zu üs Goofe ischi äll uugloplig früntlig unn höfflig gsii. Seb het me denn no nid vu allne chönne sääge, wo z Grabs en Laade koo henn.

Uf all Fäll ischt denn der «Anns»» chuu und hett us em Korpus usse n e Schachtle tnuu und alle Cuveer dorigglueget. Emol ii bii denn albigs e sebeweeg gschpannt gsii as wi en Lottoschpiiler, wenn d Lottozaale ahegleese werden. Wenn d Fotene dehinn gsii sinn, hett er, emol bi üüs Goofe, all dorigglueget unn, er het ebe würggli chönne fotigrafiere, sii Komentäär derzue ggii. Do het me do gwüsst, ob me vum sebe oder vum annere überhopt e Foti het müse mache!

Gad über t Schtroos het der Schniider Hans sinn Laade koo. Er het Herrebekleidig koo un en Huffe Joor welleweeg jede Grabser Kumfermant un Brütigom iikläidet. Zeärscht bini vum Hans, er ischt im gonze Pmüet würggli en Schniider gsii unn het jeede Chunn fachmännisch beroote, nid gad begeischteret gsii. Bi im junn het d Mueter albigs di schöene Hoose für mii kooft, und als rechte Bueb hooni schöe Hoose ghasset wi d Pescht.

Wenn er denn s Schoufenschter nöi iiggrummt het, simmer jeede Taag uf em Schuelweeg gu ggugge. Das ischt nid so uufreegecht gsii wi d Kinofotene im Schouchaschte bim Ochse junn, aber immerhin. Do sinn doch emool eme Tag, jä, seb ischt globi wi e Louffüür durs Dorf, plöemlet Twisthoose i der Uuslaag hinn gsii. Friili, s ischt t Zitt vu de Hippi gsii, aber as en Grabser plöemlet Hoose choofti, seb het denn scho neämet gglobt. Drumm simmer jeede Taag gu luege, ob si äll no dehinn seien. Emool eme Taag sinn si fort gsii, unn vu denn ewegg hemmer ällewiil uf dr Stroos ggugget, wer di sebe chönnt oohoo. Gseä hooni s nie, wer di ebe plöemlete Hose gkooft het. Me het s ei unn s onner gköert, i chönnt o ötsche en Nomme sääge, wo ummiggonge n ischt. Aber i haa s jetzt wi der Hans Segenreich. Der seb het nämlig o neämet verzellt, was miir Grabser eso alls gfotigrafiert heegen.

Drum sääg i jetz gad o nüüt!

Jugenderinnerungen von This Isler, Grabs, geboren 1954

Aktuelle Nachrichten