Bettloobe

Noch de Herbschtschtürm isch s tüer Loob a windgschützte Blätz mengmool i chnüütüüffe Maade gleege. S ganz Dorf het weret zwea drei Tääg bi Pföewetter ggloobet. Do hepme sogäär schuelfrei ka, Loobfeeri! Zittewiis hond d Ussersääss möse bi de Gmoandskanzlei Loobchaarte löese.

Drucken
Teilen

Noch de Herbschtschtürm isch s tüer Loob a windgschützte Blätz mengmool i chnüütüüffe Maade gleege. S ganz Dorf het weret zwea drei Tääg bi Pföewetter ggloobet. Do hepme sogäär schuelfrei ka, Loobfeeri! Zittewiis hond d Ussersääss möse bi de Gmoandskanzlei Loobchaarte löese. Jedi Famili het en oagne Blatz ka. Mit Reche, Beese oder zämmepundne Zwiigli hepme s Loob hoptsächli de Waldschtrooss noo zemmeggrechet und uf groessi Hüffe ggworfe. Äschtli, Buechenüssli und Schtöäli hepme ussa sortiert. Di groesse Segg sind denn mit Loob prall gfüllt hoa troat oder gfaare worde. Zum Toal hepme no Reserve-Segg gfüllt und s Loob underem Joor uustuuschet oder noigfüllt. Dehoa hepme das Loob no nootrüchnet und bald pruucht. S alt, vetruggt Loob vum voorige Joor hepme als Iischtröi im Stall pruucht. O s Loob vo de Obschtböm ischt für de Schtall gsee zum schtröiä im Winter; s Schtroa ischt nämmli z tüür gse.Di meischte hond uf dene Loobsegg gschloofe, zum Toal e par Goafe uf om Sagg. Do hepme am Aafang möse uufpasse, dass si nüd abitroelet sond. Doazmool hets no di broatere Better ggee as jetz, und d Familene sind gröesser gse. Hets mit de Zitt i dene Segg e Toole ggee, denn hepme de Sagg umtrüllet und frisches Loob noagschoppet. S het doazmool für Gwachsni scho Madratze ggee us Seägrääs und schpööter denn us Rosshoor.

Internet-Tondokumente von anonymen Sprecherinnen aus Frümsen, aufgezeichnet von Karin Lehner, Frümsen. www.doazmol.ch. Schriftliche Bearbeitung durch Judith Kessler, Gams.