St.Galler Schnitzelbänkler kämpfen mit spitzer Feder gegen Corona-Ängste: Verse gegen den Virus

Anders als die Basler hatten die St.Galler Fasnächtler ja Glück mit ihren närrischen Tagen: Ihre fünfte Jahreszeit ging, kurz bevor Corona einschlug, ungestört über die Bühne. Jetzt treten St.Galler Schnitzelbänkler mit spitzen Versen gegen Corona-Ängste an.

Reto Voneschen Aktualisiert
Hören
Drucken
Teilen

Die St.Galler Schnitzlbänkler wollen auch einen Beitrag im Kampf gegen die Pandemie leisten: Sie sind im Moment wie wild am Schreiben von Versen gegen den Corona-Virus. Sie werden zur Aufheiterung der Bevölkerung im Internet publiziert werden.

Südappenzeller.

Südappenzeller.

Bild: Benjamin Manser
  • D'Schüeler sind dehää ond d'Eltere händ realisiert,
    das nüd de Lehrer s'Problem isch - wie bisher kommuniziert!
    Mini Potzfrau macht Home-Office, au wenn i da nüd wöll,
    sie lüütet mer aa, wani wenn potze söll!
  • Mini Chind mönd au nüme go studiere,
    dehää tüends jetzt wieder Wörtli konjugiere.
    De Chlinnscht hät mer erklärt, wieso das nüme i dSchuel go mönd:
    «Wills au im Schuelhus kä WC-Papier meh hönd!»           Südappenzeller
  • De Matatouille seit em Südappezöller:
    Lehrer sii, das isch de Knöller.
    Wenns i de Schuel doch kei Schüeler meh het,
    gits so viel WC-Papier wien i wett.                                             Matatouille
Wadenbeisser.

Wadenbeisser.

Benjamin Manser
  • Verliebt bin ich neuerdings ganz frisch!
    Roti Rose stönd ufem Chuchitisch.
    Romantischi Mails schriib ich ihre -
    ha nüt me anders i de Bire!

    Online han ich sie troffe - bi de Agentur.
    Bi Akademiker und nöd öppe en Buur!
    Sie chunt - so glaub ich - vo bella Italia,
    isch sehr attraktiv und heisst Corona!               Wadenbeisser
  • Die Quarantäne nimmt eim ase mit.
    Schön, dass es bald en Liechtblick git.
    Na zwei mal schlafe, d Freud isch gross,
    am Sunntig gaat endlich d Summerzit los.                     Narr vo San Galle
  • As «Gallomisto» hani mi natürli au gfrogt:
    Wa machsch, wänn dä Virus bi de Hühner adoggt.
    Nu kai Quarantäne, so Henne muesch belohne.
    Schliessli träged ihri Eier jetz a Corona.                                    Gallomisto
  • Öpis vo dem, wo de Bundesrot unds BAG vo üs wönd,
    isch, das mir ständig üsi Händ wäsche tönd.
    Ich säg eu, i wäsch mini Händ ständig,
                                         s’hundertscht Mol isch sicher scho düre,
    i weiss da, wil langsam chunt de Oberstufe-Spick wieder füre.                                                                                                               Sack-Galler
  • Es Corona-Gschichtli und es Horro- Gschichtli do.
    Es chörnli wohrheit hets vilicht drah.
    Was mir lerned im Früehlig 2020, isch klar:
    Ohni «20Minute» und «Blick» ufem Handy gohts wunderbar.                                                                                       Sack-Galler
  • Ha hüt «SRF Sport» voll verpennt:
    «Legendäri Playoff-Moment»                                                     Alliglattohre
Die Lästerzunge.

Die Lästerzunge.

Bild: Benjamin Manser (16.2.2015)
  • De Donald Trump im Wilde Weste
    loht sich uf de Virus teste:
    Negativ – de Trump isch froh.
    Hät er echt s’Hirni teste loh?                                  Lästerzunge
  • De Bolsonaro, Superma,
    isch resistent und steckt nöd aa.
    S’Corona-Virus seit konfus:
    «Denn loh’n i halt de Typ grad uus.
    Dä isch för mi e z’grossi Hürde;
    ha au min Stolz und mini Würde.»                          Lästerzunge
Zwei-Räppler.

Zwei-Räppler.

Bild: GoZ (2.2.2018)
  • Trotz Corona fahr ich SBB.
    Das het en Rüffel vom Kondi geh.
    «Ich schwör. da isch en Notfall bi mir,
    im Zug do het's no WC-Papier.»                             Zwei-Räppler
  • Hamsterchäuf gits jetzt überall.
    Die Lüt die hend doch all en Knall.
    I glaub, die hend total vergesse:
    Hamster chammer gar nöd esse.                          Zwei-Räppler
Südappenzeller.

Südappenzeller.

Bild: Benjamin Manser (24.2.2020)
  • De Bundesrot tuet sVersammligsverbot erloh,
    damit ös d'Freiheit nüd ganz werdt gno!
    Maximum füf Persone - seg nüme zom Spasse,
    Eigentlich hättet jo vier g‘langet zom jasse...
                                                                                        Südappenzeller
  • Quarantäne, Home-Office ond Isolation;
    Social-Distancing - gleich Frustration.
    Da chönnt schlimmer see, möcht i do no erwähne,
    Stell Der vor, wärsch mit de Greta i Quarantäne...
                                                                                        Südappenzeller
  • S‘schlimmst a dere Situation,
    isch nüd Dehää bliibe i de Isolation.
    Di gross Sorg, wo mi wörkli tuet triibe:
    D'Zeugen Jehovas wösset au,
                               dass mer Dehää mos bliibe...     Südappenzeller
  • Bim Poschte hani en WC-Papier-Hamsteri entdeckt
    ond en mit annere endlose Standpauke iideckt.
    Er hett g’loset ond denn gseit i aller Rueh:
    Isch gliich, wenn i jetzt s'Gstell uffölle tue?     Südappenzeller
  • Früener went häsch müesse furze,
    ischs peinlich gsii au bime stille churze.
    Häsch rasch luut gnosse zums Grüsch übertöne,
    so häsch klammheimlich chöne föhne.
    I ziite vo Corona, es isch unerhört,
    furzisch, damit niemert dis Nüüse ghört!             Sack-Galler
  • Dä Corona-Virus schüttlet üsi Gsellschaft durenand.
    Kei Umarmig, und zur Begrüessig git me sich nüme d’Hand.
    Hender au gmerkt, sogar dä Döner schmöckt andersch
                            i dä Alupapiertäsche,
    wenn dä typ hinter vom dönderstand
                            sich d’händ tuet wäsche.                   Sack-Galler
Herr Fögeli.

Herr Fögeli.

Bild: Urs Bucher (28.2.2017)
  • Letscht Woche hani wölle go WC-Papier chaufe,
    i bi denn vo eim Lade zom andere glaufe,
    doch leider, usverchauft, kei einzigi Rolle meh,
    do han i denn googlet: Welli Zitig söll i jetz neh?

    Bi de Weltwoche beständi Gfohr, wiesed Experte druf hi,
    dass me noch em butze am End no viel brüner chönti si.
    D’Woz chön me bruche, allerdings au die nu zor Not,
    me werdi zwor suber, aber s’Födle seg nochher ganz rot!

    Empfehle tönds nu s’Tagblatt,
                                      s’chön no vill ufneh, seg farblos, also Note 1a,
    nu – wötsch jo vorem Butze, au no öpis z’lese ha!                   Herr Fögeli
Narr vo Sangalle.

Narr vo Sangalle.

Bild: Benjamin Manser (24.2.2020)
  • Stasch uf em Balkon und gseesch dune d Chind.
    Lached luut und laufed gschwind.
    Denksch: Schön, s Läbe so vo wiitem z ghöre.
    S chan nöd e mal dis Mitagsschlöfli stööre. 
                                                                                     Narr vo Sangalle
  • De ersti Tag isch glimpflich abgloffe.
    Nöd z vil ggèssen und nöd z vil trunke.
    I de Wohnig kei Viren aatroffe.
    Villicht einere vom Balkon gwunke...            Narr vo Sangalle
  • S Fazit am Morge vom Tag drei:
    Sisch sozäg gliich wien am Tag zwei.
    Als Risikogruppe uf em Balkon sta...
    ...und weit und breit kè Gruppe da.               Narr vo Sangalle
  • Stasch z'Nacht als Risikogruppe,
    uf em Balkon und gsesch e Sternschnuppe.
    Denksch: Du ganz eleige, häsch si gsee,
    wirsch nöd chrank, und s tuet nöd wee.      Narr vo Sangalle
  • De Heime z'sèchste Fondue esse,
    mües mer us besagte Gründ vergèsse.
    D Frag isch, ob‘s ècht en Uusnaam wüür gee,
    wenn jedes si‘s eigeni Caquelon wür nee.     Narr vo Sangalle
Lästerzunge.

Lästerzunge.

Bild: Ralph Ribi (6.2.2016)
  • De Hamster seit de Hamster-Lüüt:
    «En Hamster nützt geg s‘Virus nüt.»             Lästerzunge
  • Häsch du de News us China traut?
    Zehn Tag – scho sind Spitöler baut.
    D’Chinese sind doch Buurefänger,
    bi üs goht jo scho s’Schlüüsse länger.            Lästerzunge
Matatouille.

Matatouille.

Bild: PD (20.3.2020)
  • Seit de Hamschter zum Oschterhaas,
    eifach nur e so zum Spass:
    «Säg emol, ganz rudimentär,
    Wo ninnsch jetz du no Eier her?»                             Matatouille
  • Ehrlich gseit, me isch heilfroh,
    isch de Corona-Virus do.
    Will im gsamte Ziitigswese
    gits nüt meh vo de Greta z’lese.                               Matatouille
  • Hesch gseh, wie d’Chinese i nur zehn Täg
    es riise Spitol uufbaut hend.
    Bi üüs duuret, und das findi schräg,
    allei nur en Abbau scho es Johrzehnt.                     Matatouille
  • Hesch trochne Hueschte und s’tuet pfuufe,
    dörsch worschindli kei Dry Gin suufe.                      Matatouille
  • Wenn s’WC-Papier optimal wötsch nutze,
    nimm jedi einzelni Lag zum butze!                              Matatouille
Herr Fögeli.

Herr Fögeli.

Bild: Benjamin Manser (16.2.2015)
  • Bekanntlich macht mini Ilsebill,
    nöd immer das, was ich gern will.
    Mol isch es s’Chopfweh, mol ploget de Rugge,
    i glaub aber, sie will sich eifach nu trugge!
    Denn plötzlich, sit’s de Virus git,
    fühlt sie sich gsund und total fit.
    Sie jommeret nüme, seit tröstend: Min Alte,
    tuet mer Leid, aber mer sötted Social Distancing ihalte!                                                                                                Herr Fögeli
Inspektoren.

Inspektoren.

Bild: Urs Bucher (28.2.2017)
  • I de Bar meint s'Kronenbourg zum Appezöller-Bier:
    Gömmer jetz zu mir oder gömmer zu dir?
    Do drauf sait s'Appezöller schnöll:
    Ma chérie, ta gueule, je marche seule!                 Inspektoren
  • Fiire gäge Vire:
    S'zweite elei dihei!                                                     Inspektoren
Susle & Wunderli.

Susle & Wunderli.

Bild: Urs Bucher (28.2.2017)
  • Virus, varus, Löffelstiel,
    wer nüt lernt, de weiss nöd viel.
    Die einte gönd no chli go jasse,
    di andere tüend verusse spasse.
    Sie säged: Da goht mi nüt a.
    Ha scho mengs anders Grippli gha.
    Virus, varus, stimmt leider nöd!
    D’Lüt sind mengmol eifach blöd!                                Susle
  • Hegottsack da Virus isch brootal,
    Äs loot em kee Wahl.
    Am beste isch mör gönd all in chöller,
    Denn dött isch s´Lager vom Appäzöller.                    Wunderli
  • Au im Sport lauft nüme viel,
    sogar de Fuessball dä liit still.
    Hey Wunderli, etz isch’s sowit,
    was machsch denn du mit dinre Zit?
    Susle, los, ich weiss s’isch schitter,
    aber ich bild mi etz halt witer.
    Wirsch es nöd glaube, ich mach au selber Sport,
    aber für mi elei, amene sichere Ort!                             Susle & Wunderli
Tatü.

Tatü.

Bild: PD (18.3.2020)
  • Wenn Du Dich schlächt fühl'sch, d'Stirn ganz heiss.
    Wenn z'Nacht nümm schlaf'sch, bisch voller Schweiss.
    Denn weisch, jetzt hesch die schlimm Bescherig:
    S'isch höchschti Zit für d'Stür-Erklärig!                     Tatü
  • Bim Hamschtere bin ich voll derbi...
    Dank mim Chauf vo tusig Fläsche Wi!                         Tatü