SPRÜCHE: Trump, Buschor und Pappa als Schnitzelbank-Stars

Der Schnitzelbank-Jahrgang 2017 ist reichhaltig. Mit vielen Themen und giftigen Pointen. Hier eine Auswahl. Am Schnitzelbankabend vom Montag fotografierte Urs Bucher.

Drucken
Teilen

Desäb Türk,

dä Geldwöschmaschine-Veträter,

hät de FC Wil etz

vetschuttet, säb hätter!

Etz wöll er

de FC Sanggalle chauffe!

Denn wör’s dene

sicher besser lauffe.

Aso do wör ii nöd lang werweisse,

au wenn’s denn mösst

«FC Sankt Gülen» heisse.

Papagallus

Marktplatz

De Hugetobler und de Ganz

wönd gmüetlech dossä hoggä,

dromm söll’s

am Marktplatz Sonnä geh,

d’Acrevis muesch verroggä.

Isch da denn wörklech nötig?

Do wunderesch Di scho.

Wenn’d mi frogsch,

hend die zwei scho

jetz z’vill Sonne öbercho.

Gallyriker

För Notfäll han ich

im Arzneimittelschrank

en Johann-Schneider-

Amman-Trank.

Sie, ich wör mit ihne wette:

Sie hend kei so gueti

Schloftablette.

Zwei Räppler

Jo hueresiech,

was isch denn das?

I bi jo vo obe bis one nass!

Worom?

Uf em Handy mösst i da gseh.

Wie heisst die App?

Ah: «Wetterfee»!

Jo hey! Dasch mer jo

scho mol begegnet!

Uf em Handy stoht: «Es rägnet.»

Papagallus

Trump

Jo, de Trump, i weiss nöd,

söll i brüele oder lache:

Mengmol denk i,

er het sin Grind nu zom

sin Eichhörnlischwanz amache.

Herr Fögeli

«Uaa!» Wenn’d da ghörsch,

denn isch’s de Nadal.

«Uaa!» Denn haut de Nadal

uf de Tennisball.

«Uaa!» Wenn nu de Scheitlin

au so schreie chönnt

«Uaa!» im Moment, wo n er,

zack, alli Sterne aazönt.

Papagallus

Pappa

Als Bauvorstand i dere Stadt

bruuchsch nöd so vill Know-how.

Diä Wahl gwönnsch,

well no jung und lingg bisch,

sowieso als Frau!

Vom Beery hät mer’s gwösst,

und bi de Pappa nennt mer’s aa,

dass sie als Wiibli denä

Mannä d’Stange hebä cha.

Jegersli Nei, da isch nöd nett gsii!

Jegersli Nei, da hät ka Stil!

Denn näbt de andre Pappeli

isch sie no sexy

und geischtig fit,

si wirkt scho fascht Pappa-mobil.

Gallyriker

Eini vo de Pisa-Froge isch gsi:

«Was grenzt a Dummeit?

Was chönt das si?»

Überraschend hüfig

isch d’Antwort cho:

«Das sind doch

Kanada und Mexiko!»

Zwei Räppler

De Elmar Jud,

dasch kan Witz, dasch wohr!

will e Tüüfgarasch grabe

am Schibenertor.

Aber för en seg die Garasch –

jawoll! exakt!

– usschliesslech

en humanitäre n’Akt!

I de Garasch one –

d Stadt werdi sech freue –

täg me denn d’Autofahrer

psychologisch betreue:

Me gäb ene Deckene,

Troscht und Chueche,

will’s traumatisiert sind

vom Parkplatz-Sueche.

Papagallus

Nächste Haltestelle: Wil

Der FC Wil, ich find’s en Hohn,

schpielt Fuessball

ohni Türke-Lohn...

will s’Fraue-Team,

trotz Günal’s Wille,

wott Fuessball

ohni Burka schpiele.

Doch s’neu Stadion

händ’s mer brichtet,

wird konsequent

nach Mekka grichtet.

Tatü-Tato

Hohes Gericht

De Güntzel hät us Bürgerpflicht,

d’Weiche gstellt

för s’Obergricht.

Mer mached do e Frogezeiche:

Sit wenn hät s’Abstellgleis

e Weiche?Lästerzungen

Wenn d’Baubehördä vo dä Stadt

selber baut – denn wird’s sauglatt.

Tüänd die

viel z’tüür renovierä,

cha’s halt scho ä Mol passierä,

dass Deggi dir

bim Faccincani

in Teller gheit uf dä Salami.

Pfannenhexen

Wenn Adam en Eva isch

und Pappa e Frau

Denn isch de Güggel e Henne

und de Eber – genau!

Us de CVP wird d’SP

– schwarz isch jetz rot!

Und de

CVP-Präsident Hugetobler

meint, gstorbe

isch no lang nöd tot!

Wenn ein

uf d’Schuldebremsi stoht,

moner aber nöd stune,

wenn’s nüme vorwärts goht!

Herr Fögeli

«Drohne im Alpschtei,

die ghöred vebotte!»

Da velangt die huere

Tierschutz-Flotte!

Klar: Eso Gemsli,

me weiss nöd worom,

stürzed mengmol ab

und chömed om.

Aber mer finded,

mer vom Drohne-Verein:

Rootchrut mit Gemsbroote,

dasch halt soo fein!

Papagallus

Burka

E Burka, ehrlich, tuet mer leid,

wär eigetlich e super Kleid.

Stülpsch eifach dröber,

s’wär de Wahn

för de Köppel und de Erdogan.

No besser wär’s

för diä zwei Drache,

me chönnt de Sack

no schalldicht mache!

Lästerzungen

Mer Schwizer bruuched

kan Allah!

Mer bruuched au kan Jehovah!

Aber weisch, wie’s üs wör

zämeschweisse,

wenn de Jesus

wör Roger Federer heisse!

Papagallus

Z Sangalle chönd’s nöd

für en Füüfer studiere:

Bim Riethüsli wänd’s

de Vercher go dosiere.

Hetted mir en Trump,

oder suscht sonen Schlaue,

wür mer um Appezell

umme n’e Muure baue.

Narr vo Sanggalle

America first

Hät ein e Hoorfarb wiä s’Kamel

und bruucht zum Strähle

ziemlich Gel,

denn schlüss i drus

– do seichsch i s’Nest –,

vom Kamel

stammt au de Rest.

Lästerzungen

Nächste Haltestelle:

Toggenburg Schwendisee

Das Klanghus

miecht am Klöti Spass.

De Ma glaubt

no an Oschterhas!

Das Klanghus wird eus

nie erfreue,

im Toggeburg

tüend’s lieber heue.

Schtatt Künschtler

mit Millione z’mäschte,

gänt’s Gäld döt us

für Göllechäschte!

D’Regierig do,

oh Schreck, oh Graus,

die glaubt halt no

an Samichlaus.Tatü-Tato

E Bemerkig no am Rand:

Am schönschte isch

de Ruhestand

för Päpscht und Fifa-Präsidente,

för Bundesrichter und Regente.

Nume, und da isch chli blöd,

för de Günzel gilt da nöd.

Alliglattohre

Akte X, z Sangalle,

es isch mysteriös.

De Crash vo de Frau Adam

isch ganz schön bös.

Hät’s im Rathus und

de Langass e so Straalige gee?

Oder isch de Postautochaufeur

au i de CVP?

Narr vo Sanggalle

Nochem Unternehmesstür-3-

Abstimmigsdebakel

bruchted’s e Pause.

Alli Verantwortliche

sind am Jömerle und wiit weg

isch die grossi Sause.

Einzelni, so hät mä ghört,

nämed e Uusziit,

zum Bispiel dä Herr Kuurer

Und dä Ueli mach in Amerika

es Praktikum,

döt suecheds schiints no Muurer.

Dompfaffen

Dött hönne im Alpsteh,

dött stoht en Halbmoo.

D Botschaft dehöndä,

ischt eefach z verstoh:

«Türke willkome»,

da säät er mit Stil.

Doch leide häts nütz

gnötzt bim Tschutticlub Wil.

Alliglattohre

Ein ganzer Buschor

Dä Stadtrot Buschor

mag kei halbi Sachä.

Er will drom

kei halbi Notä me machä.

Au d’Sömmerliwisä

loht em kei Rueh,

ond zum Trotz macht

er au s’Tschudiwies no zuä.

Statt im Regä vo dä Quartier

und dä Lehrer z’stoh,

hett er glob gschider

doch d’Baudirektion öbernoh.

Dött wör dä sachverständig

Bauverhinderigsrot,

emm scho zeige,

wiemä d’Finger vo alläm loht.

Mit Huet s’äm Buschor

besser goht,

wenn är ällei im Regä stoht!

Halleluja!

Gallus

Apropos Exit

De Müller sait

em Giacobbo: Los, du Glatte!

Chum jo nöd nomol,

sus tueni di bestatte!

Gallomisto

Im Tele Blocher

wirbt dä Blocher

für dä Blocher,

noch und nocher.

So viel Blocher bruch ii nöd,

diä Werbig isch mir eifach z’blöd.

Im Fernseh

chann ii besseri gseh:

Bettwarä Fischer, Zörisee!

Pfannenhexen

Marktplatz

S’chonnt neuä Schwung

i d’Marktplatz-Diskussion

Voräm Vadian ä Piazza,

isch die gross Vision.

Statt dä Acrevis wöreds

gschider s’Amtshus verlegä,

so wör i dä Verwaltig sich

wenigschtens d’Höttä bewegä.

Und im Martplätzli,

im Schildknecht

sim Gaschtroladä,

Chönnt ä chli meh

Chundäorientierig

jo au nöd schädä.

Alleluja Pappa Maria,

s’Amtshuus isch andata via!

Gallus

Marktplatz

Am Bohl meined Gschidi,

d’Acrevis seg en Dregg

Da Hus seig z’gross

und müessi dött awäg.

Nu weiss niemert wie,

dass die Bank nüme stoht.

Froged de Hummler,

dä weiss wies goht.

Gallomisto

D’ St. Galler Grüenabfuhr,

es isch dä Wahn,

uslaschtigsmässig scho

no nöd ganz im Fahrplan.

Dä Kantonsrot hät aber

die Sach scho mol kapiert

und de Kriechende Günzel

grad abtransportiert.

Stossgebät:

Rapünzel, Rapünzel, Rapünzel,

nix wars mit Richter Günzel!

Dompfaffen