Cordulafeier

Klatschblase Klingelfuss: «En siebte Stadtratssitz als Lehrstell»

Torwächter Silberysen und Klatschblase Klingelfuss haben beim Cordula-Schwatz am Mittwoch das städtische Geschehen aufgegriffen.

Roman Huber
Drucken
Teilen
Frau Klingelfuss diskutierte mit Torwächter Silberysen das Badener Stadtgeschehen.

Frau Klingelfuss diskutierte mit Torwächter Silberysen das Badener Stadtgeschehen.

Alex Spichale

Frau Klingelfuss: Das isch doch sicher de Silberyse. Wer het glüütet?

Torwächter Silberysen: Ich!

Kl: Has doch dänkt. Guete n Obig, Herr Silberyse.

Si: Guete n Obig Frau Klingelfuess.

Kl: Wie goht's. Immer no chli Nochwehe!

Kl: Nochwehe? Aber nid öppe no vo de Badefahrt?

Si: Neinei, vo de Wahle!

Kl: Jo die Merkel, und dass jetzt d AfD in Bundestag inecho isch .

Si: ... das sind doch die Nazi-Type?

Kl: Kei Nazi-Verglich, Herr Silberyse!

Si: Ou jo, suscht goht s mir no wie im Fricker. – Nei, Nochwehe han ich wäg de Badener Wahle.

Kl: Ah, will de Geri Müller scho als Stadtrat usegfuulet isch.

SI: Nei, will d Kohleri ine cho isch.

Kl: Aber Herr Silberyse, die bringt doch äntli früsche Wind in Stadtrat. Und: Wüssed Sie de Neuischt?

Si: Nei.

Kl: De siebte Stadtratssitz wott Bade künftig als Lehrstell uusschriibe. Also ich find das guet.

Si: Und die vo de AZ findet d Kohleri jetzt au guet ...

Kl: Wieso?

Si: ... nachdem sie es eisiitigs Inserat gmacht het. Jo klar, wenn die denn als Stadtamme bi jedem Entscheid wieder eis schaltet, um d Bevölkerig z frooge, was sie mache söll, denn schänkt das schön ii.

Kl: Jetzt höred Sie uf spöttle. Also mir händ ihri Videoboschafte eso guet gfalle.

Si: So?!

Kl: Sie, die het gseit, dass sie au als Frau Stadtamme de Andi no uf de Strooss würdi küsse.

Si: Vo mer uus chan sie ihm aus es Selfie schicke. – Nei, und jetzt will sie zu allem ane no Frau Stadtamme werde! Kei politischi Erfahrig, parteilos – mir wänd doch kei Wundertüte als Stadtamme! Also ich bin scho ehner für de Erich Obrischt.

Kl: De Obrischt? Ei Windfahne uf em Stadtturm langed für Bade!

Si: Windfahne? Jetzt werded Sie nid fräch gäg de Obrist!

Kl: Händ Sie dem sin Smartspider gseh? De isch jo sit de letschte Wahle vo links nach rächts überegrutscht.

Si: Smartspider! Das isch doch so en moderne Computer-Seich, wo jede chan manipuliere, wie n er will. De Obrischt isch ebe flexibel und het gmerkt, dass es im grüen-rote Stadtrat doch es bitzli meh Gwicht uf de rächte Siite bruchti.

Kl: Vo dem Gwicht han ich bis jetz no nüt gspürt. Emol sicher nid bim Entscheid, d Busrampe für d Velo uufztue. E so en Furzidee! Und bim Nordportal: eimol wott er em de Hahne zuedreihe, und dänn kräbst er wieder zrugg. – Wer unterstützt überhaupt de Obrischt?

Si: De Geri. Und de Obrist isch denn bi es paar alte FDP-ler ganz dick dinne. Dank dene isch er scho so gleitig in Stadtrot ine cho vor zwöi Johre.

Kl: Bi de Ammewahle hets aber chli meh Gägewind! – mit em Schneidi als Konkurränt.

Si: Aha, Sie stönd uf de Schneidi! Mer langed z Bern obe en Schneider-Ammann. Händ Sie gseh, wie de Obrist uf sim Wahlplakat zackig voruusmarschiert – dem macht Gägewind nüt uus! – De blosed de Schneidi grad um.

Kl: De Schneidi isch selber vo de Bloser-Clique, als Vizeamme haut ihn nid grad öppis um. Ned emol, dass de Obrist jetzt s Sekundarstufezentrum Burghalde wott abschüsse.

Si: De Obrischt het rächt. Für was bruuched mer für Badener Schüeler es so n es grosses Schuelhuus?

Kl: Dänk nid nur für d Badener Schüeler. Au für die vo Ennetbade, Birmischtorf und Ehredinge.

Si: Selled doch die bi sich diheime id Schuel goh. Mer müend z Bade spare, baschta!

Kl: jojo, kaputtspare sölled mir euis. Wo füehrt das ane? Aarau isch im Städte-Ranking scho lang vor Bade, und bald überholt euis no Wettige.

Si: Au z Wettige sind di guete Ziite verbii. Jetzt müends jo mit dem Stüürfuess ufe.

Kl: Mer müend das au, Herr Silberyse, und zwar acht Prozänt – bi dene viele Projekt: Schuelhusplatz, es paar Schuelhüser, wo s bruucht, Kurtheater.

Si: So es Affetheater um de Stürfuess bruucht s sicher nid. De cha mer ufetueh, wenn s denn nötig wird. Die selled zerscht emol lehre spare im Stadthuus.

Kl: Genau, de Torwächterdienscht chönted s abschaffe!

Si: Jetzt gönd Sie aber z wiit, Frau Klingelfuess, das empfind ich als en persönliche Aagriff.

Kl: So han ich s nid gmeint, Herr Silberyse. Vom er us cha mer de Torwächterdienscht au eifach uslagere – an e Privatfirma.

Si: Die sell denn mich aber gfälligscht au überneh.

Kl: Genau, und villicht übernimmt sie au no de Geri.

Si: De Geri?

Kl: De bruucht doch denn en Job, wenn er die zwöimol 135 000 Stutz duregloh het, wo n er no überchunnt.

Si: De Geri chann doch sini Firma wieder reaktiviere!

Kl: Goht nümme. Die isch jetzt archiviert.

Si: Wieso denn das?

Kl: Alles, was emol im Stadthuus gsi isch, chont is Stadtarchiv.

Si: I dem Fall chont au de Roger Hueber det ane. – Dass de jetzt ufhört im Stadtrot. Er isch doch no en Junge?

Kl: De isch scho am längschte im Stadtrot. – Er isch ebe en Chliine, drum meint mer, er sig no en Junge. Für ihn chunnt denn en rassige Junge ine, de Ramsy!

Si: Jojo, s Ramseiers wei go gra-a-a-ase (singt). Die werdeds sicher no luschtig ja im Stadtrat. – Emel luschtiger, als wenn d Libardi ine cho wäri.
Kl: Also d Libardi, die het denn eine druff! Schad, isch sie nid gewählt wurde.
Si: Die vo de Schuelpfleg händ ehner gmeint, dass die amigs chli es Puff gah hebi. – Jä nu. Jetzt isch defür de Gotter nomol ine cho.
Kl: Dem het doch sin Blitzer bi de Gstühlchrüzig sicher no Stimme vo de Lingge brocht.
Si: Höred Sie mer uf mit dem blöde Radarchaschte. De Kanton het jo de Stadt dewäge schön d Chnöpf ii toh!
Kl: Sie sind grad de richtig: Do fehlts de Stadt a Gäld, und sie sind gäg en Blitzer, wo jöhrlich en halbi Million würd i d Stadtkasse ine spüele. Eusi Polizei macht jedefalls ihre Job guet.
Si: Do bin ich nid so sicher. Bim Abfüere vom Navin Hstettler vo de SVP sinds eidütig zwiit gange.
Kl: Wieso?
Si: Er het jo a de Badefahrt nur Unterschrifte für dVerhülligsverbot-Initiative gsammlet.
Kl: Sorry, aber a de Badefahrt goht en normale Mönsch au nid go Unterschrifte sammle. – Viellicht probiert er s nomol während de Fasnacht ...
Si: ... als Mohrechopf verkleidet. – Ou, das Wort darf mer jo bald nümme säge. Aber sie händ Rächt, Frau Klingelfuess. Badefahrt isch würkli zum Feschte und Gnüsse do.
Kl: Gnüüsse? Bi dene vile Lüüt? Do bisch jo uf em Schlossbergplatz fascht nümme dure cho.
Si: Säged Sie nüt! Als Torwächter bim Stadtturm bin ich fascht verzwiiflet.
Kl: Aber schön isch sie trotzdem gsi, eusi Badefahrt! Di viele herzige Beizli, überall Unterhaltig, die uufgschtellte Lüüt. Ich vermisse sie eso.
Si: Jo was!
Kl: Jede Morge lueg ich alli Plastik-Bändeli aa, wo n i de Chuchi ufghänkt ha.
Si: Am zweite Sunntig hets nur no es Papier-Bändeli gäh. Und ich bi froh, dass sie verbi isch.
Kl: Das verstoni nid.
Si: Die gspunnige Boute, de Soulärm vo dem Musigbrei und die viele Bsoffne. - Polizei, Sanitäter und Samariter sind ämel schön a ihri Grenze cho. Ziit, das wieder d Normalität cho isch.
Kl: Normalität? Also ich gschpür z Bade nüt dervo: S Kurtheater isch nonig umbout, de Schulhuusplatz nonig fertig ....
Si: ... i de Bäder gseht s uus, als hetti es Bombardement stattgfunde und passiere tuet überhaupt nüt – debii sett ich mit mim Rheuma scho lang wieder go thermalbädele.
Kl: De Mättelistäg chunnt dänk au nid z’stand, vo de Sitzstufe a de Limmig wämmer scho gar nid rede. - Defür gits jetz es Kafi bim Tränebrünneli. – Und d Stella hetti fascht müesse ihri Unvermeid-Bar zuetue.
Si: Sie sägeds, nur fascht. Ich han s Gfühl, einisch wird das trotzdem unvermeidbar – he jo, nomen est omen.
Kl: Denn wird sie sogar Bade verloh ... das hett sie emel gseit.
Si: ... die chämti sicher wieder mol zrugg – viellicht denn sogar als Maa. Ja, d Ziite änderet sich, und mir euis mit ihne. Latinisch ...
Kl: ... «tempores mutantur et nos mutamur in illis»! Jo Herr Silberyse, das sind no Ziite gsi, wo n ich is Latsch gange bin.
Si: Und hüt? Gits bald Früehenglisch scho i de Spielgruppe.
Kl: Klar, und im Chindsgi fangeds scho mit Cyber-Mobbing aa. Also ich wett hüt nümme jung sii.
Si: Gälled Sie, chli jung uusgseh würd ihne scho lange ...
Kl: Da seit grad de richtig! So alt wie Sie usgsehnd, cha mer jo ned emol werde.
Si: Ou, jetzt isch aber Ziit, ich muess schleunigscht hei – suscht gsehn ich denn würkli alt uus. Also, isch nett gsii! Uf Wiederluege Frau Klingelfuess.
Kl: Adie Herr Silberyse! – Und das wägem «alt usgseh» – sorry – im Geischt sind sie defür jung blibe ...